الشخصيات :
الضابط شوقى :المسئول عن قسم شرطه مشمش سيتى
سوسو : سكرتيره القسم
العسكرى رجب
بائع الورد
بائعه المشروبات الغازيه
اللواء
الطفل
احمد نصر الدين : مخرج سينمائى
مايسه : فتاه اعلانات وخطيبه احمد
الدوله :الجمهوريه الملكيه العربيه الاعداديه المشتركه
المكان :
قسم شرطه فاخر.. اشبه بالشركات الاستثماريه الكبرى .. ويتكون المنظر من باب و رسبشن لاستقبال الجناه على خلقيته لوحه معلق عليها سلاسل مفاتيح السجون .. وكمبيوتر ... وتليفون ..ومكتب الضابط شوقى عبد السلام .. ابواب مختلفه لغرف الحجز
الزمان :
اى قت
عسكرى رجب واقفا امام باب القسم .. سكرتيره باهره الجمال خلف الريسبشن .. بينما الضابط شوقى واقفا مذعورا خلف مكتبه يتحدث تليفونيا
شوقى : تحت امرك يا فندم .. لا والله .. المسأله ان الحاله الامنيه مستتبه يافندم .. حضرتك عارف بقى ان فيه حاله كساد ف البلد .. النهارده يافندم .. لا انا هاكلمك بنفسى .. حاضر يا فندم .. مع السلامه ( يضع سماعه التليفون ) اعمل ايه (يرن الديكتافون )
سوسو : (بلكنه مبالغ فيه ) قسم شرطه مشمش سيتى .. تحت امرك يا افندم
شوقى : انسه سوسو .. ابعتيلى العسكرى رجب بسرعه
سوسو : تحت امرك يا افندم .. ( تضغط زرا فى الدكتافون .. عسكرى رجب يخرج من جيبه موبايلا )
رجب : الو .. عسكرى رجب سبيكنج ..من معى على الهاتف النقال؟
سوسو : استاذ عسكرى .. حضره الضابط شوقى عايزك فى مكتبه حالا
رجب : علم وسينفذ .. الى اللقاء ( يذهب اليها يناولها الموبايل ) اقفلهولى اصل مبعرفش اقفله
سوسو : برضه ؟ .. برضه يا استاذ عسكرى
رجب : مش قلنا بلاش استاذ دى
سوسو : لو سمحت .. احنا ف قسم شرطه .. عيب كده
رجب : (منتفضا ) سعاده البيه طالبنى
سوسو : ثانيه واحده .. اديله خبر ( ترن عليه ) عسكرى رجب طالب مقابلتك يا فندم
شوقى : خليه يدخل ..
( سوسو تشير له بالدخول .. رجب فى مواجهه شوقى )
رجب : تمام يا فندم .. ( شوقى يقف ويتجه الى رجب .. وينظر له متأملا فيرتبك رجب ) فيه ايه يا باشا ؟
شوقى : اخرس ( مازال يدور حوله .. فجأه يقوم بتفتيشه ذاتيا )
رجب : جرى ايه يا بيه ؟
شوقى : اخرس واتنيل اقعد
رجب : لا مؤاخذه على مقامك يا بيه ؟
شوقى : ( بغضب ) اقعد
رجب : حاضر
شوقى : ( يدق الكتب بعنف ) قوللى
رجب : ( منتفضا ) برئ يا بيه والله
شوقى : اقعد ..( يتنهد وبهدوء ) النهارده كام ف الشهر
رجب : نعم يا بيه
شوقى : النهارده كام فى الشهر ؟
رجب : ليه يا بيه ؟
شوقى : جاوب على قد السؤال .. كام ف الشهر
رجب :25منه يا باشا
شوقى : 25 منه .. ( يذهب ويجيئ ) 25 منه .. سين .. فاضل كام يوم على نهايه الشهر
رجب : جيم .. 5 تيام يا افندم
شوقى ) : بانفعال ) غلط
رجب : جيم 2 يبقى 6 ايام منه يا فندم .. بس احنا ف نوفمبر .. ونوفمبر 30 يوم ومجتش اشاره بتغييره يا فندم او جت وانا معرفش
شوقى : برضه لأ .. غلط
رجب : سيادتك اصدق يا افندم
شوقى : فاضل 3 تيام ونقفل الشهر .. انت ناسى اننا بنقفل الشهر يوم 28 ونسلمه ف مديريه الامن يوم 30
رجب : لا مؤاخذه سعادتك يا فندم .. اى فورجت .. نسيت يعنى
شوقى : حلو .. تقدر تقوللى .. عندنا كام واحد ف الحجز دلوقتى .. الشهر دا عملنا كام قضيه ؟
رجب : ( بارتباك ) ولا واحده سعادتك
شوقى : ولا واحده .. ممكن تفهمنى ازاى الكلام دا ؟
رجب : ( واقفا وبعنف وقوه مبالغ فيها وهو يؤدى التحيه العسكريه للعلم على مكتب الضابط شوقى ) البلد حالها اتعدل يا فندم
شوقى : يا سلام .. حالها اتعدل .. على سهوه كده .. انتوا اللى مش شايفين شغلكوا كويس .. تقدر تقوللى دلقتى هانسلم المديريه ايه ؟ اتكلم
رجب : سيادتك ادرى يافندم شوقى : طبعا انا ادرى .. معايا حبة مهملين .. الاقسام كلها بتخلص المستهدف اللى هو التارجت بتاعها يوم 3 و 4 و5 ف الشهر .. ويريحوا بقيت الشهر .. هنا فيه اهمال .. تسيب .. كل الشكاوى فى مجلس الاداره لاقسام بوليس الجمهوريه الملكيه العربيه الاعدايه المشتركه كلها جايه م القسم بتاعنا دا .. كلها على قسم شرطه مشمش سيتى و كأن مفيش غيرنا .. انا شكلى قدام الباشوات الكبار بقى فانله .. ( يكتم ضحكته فتخرج دون ان يقصد من انفه ) ايه بتقول ايه ؟ بتبرطم فى ايه ؟
رجب : ولا حاجه .. انا هانزل الشارع اجيبلك كام قضيه سقع .. يرفعوا راس سيادتك
شوقى : وليك مكافأه لو عملت كده .. هزودلك العموله 2 %
رجب : احلام سعادتك اوامر يا فندم
شوقى : بس متتأخرش
رجب : تمام يا فندم
( يخرج رجب .. شوقى لسوسو من خلال الدكتافون )
سوسو : قسم شرطه مشمش سيتى .. تحت امرك يا فندم
شوقى : اعملى اتصالاتك حالا .. بكام شركه نصب وسرقه .. واسأليهم .. مبعتوش قضايا ليه الشهر دا .. واتصلى بحكمت بيه على الموبايل اللى مش متراقب .. اسأليه فين قضيه المخدرات اللى اتفق معايا عليها .. وماتنسيش فاكوك هانم .. قولولها ان الشقه اللى قالت عليها دى بتاعه زوزو هانم ودى احسن عميله للقسم .. خليها تشوف شبكه تانيه .. مفهوم
سوسو : مفهوم يا فندم ( تبدأ فى اتصالاتها )
شوقى : ( يفكر ) انا مش فاهم الراجل دا حاططنى ف دماغه ليه ؟ .. اعملّه ايه يعنى ؟ مش عاجبه العجب .. راجل معقد .. حتى بنته شبهه ..معقده ..( ضاحكا ) دا يوم حفله راس السنه ..كانوا هاملين حفله تنكريه افتكرتها صول .. رحت سا كعه على قفاه .. اتاريها بنته ولابسه صول .. حفله تنكريه بقى .. والمصيبه الاكبر ان الباشا كان لابس حرامى .. متهيألى جزمتى لسه معلمه على ..... ياللا مشم مهم .. اللى غلط غلطه لازم يدفع تمنها .. مش هانسى بصته ساعتها وهو بيدعك ف ...... ضهره .. وبنته .. الاتنين .. هو دا اللى مخليه حاططنى ف دماغه .. طب انا اعمل ايه فيه واحده ف الدنيا مالهاش اى ملامح .. ( للجمهور ) ايوه مهندهاش اى ملامح .. دا حتى معندهاش .. تيت تيت .. اعمل ايه بقى .. انا حتى مش عارف ازاى هما عرفوا انها انثى .. هما اتأكدوا قبل مايصنفوها انثى .. شافه اى حاجه ؟ انا مش شايفها .. بس ازاى بس ؟
( على الجانب الاخر يدخل عسكرى رجب من باب القسم .. مع صوت جلبه )
رجب : اخرس يا متهم منك له .. خليكوا واقفين هنا .. فيه نظام .. بالطابور يا سيتيزن منك له .. دعه جانبا يا زميل .. خليك واقف عليهم لغايه مابلغ البيه الظابط .. ( لسوسو ) بلغى البيه الظابط انى قبضت على تشكيل وزارى .. قصدى عصابى ..
سوسو : ثانيه واحده .. ( بالدكتافون ) ايوه يا فندم عسكرى رجب جابلك عصابه
شوقى : خليه يدخل بسرعه .. ثانيه واحده .. خليه يدخلهم واحد واحد
سوسو : تحت امرك يا فندم .. اتفضل يا عسكرى رجب
( شوقى يعدل هيئته ليوحى بالعظمه والقوه وهو يحاول ان يخبئ سعادته )
رجب : اجهز يا متهم منك له .. واحد واحد هايدخل هاتلى الولانى ده .. ايوه .. بائع الورد الرومانسى .. كامون هير
بائع الورد : ( يدخل وهو فاقد وعيه تماما فهو متعاطى للاقراص المخدره ) ايه يا عم ؟ فيه ايه يا با ؟ هو انا عملت حاجه .. انت هاتحطلى المعلقه ف الفيديو ليه بس ؟
رجب : اخرس .. انجر امامى يا وغد
بائع الورد : ياعم ماسميش وغد .. انا بياع ورد .. اهه .. الورد اهه .. انت شكلك كده سقسقت البلكونه فله
رجب : فله .. طب خش يا كاتنله ( للضابط ) تمام يا فندم .. ( لبائع الورد ) اقف هنا يا متهم
بائع الورد : هنا والا هناك ؟
رجب : هناك
بائع الورد : يبقى ماتقولش هنا
رجب : اسمع الكلام واترزى هنا
بائع الورد : اقف والا اترزى
رجب : اقف مرزى هناك هنا ( البائع يذهب و يعود و يجلس ويقف فى حيره )
بائع الورد : خلاص يا عم .. انت هاتضرب شاكوش ف دماغى .. انا اهه قدام البيه .. وحياة دى النعمه ( يخرج من جيبه شريط حبوب مخدره ليحلف عليها ) وما اوعى ابرشم تانى ابدا .. انا معملتش حاجه
شوقى : يعنى هو هايجيبك هنا م الباب للطاق
بائع الورد : لا يا بيه الكدب خيبه .. هو جابنى من الكورنيش للقسم .. واخدشى منى سكاسك الطريق خالص .. انا لابس جزمه جديده ولا مؤاخذه ماليش دعوه بالقانون خالص .. ماشى ف حالى .. وحياه دى النعمه ( يحلف على الاقراص المخدره )
شوقى : بس يالا .. اقف ثابت .. انت بتتهز كده ليه ؟
بائع الورد : ( لرجب ) بيقولك اقف ثابت ..( للضابط ) يابيه دا شكله مبرشم
رجب : بس يا متهم .. شت أب
شوقى : خليك بره انت ( يهم بائع الورد بالخروج ) مش انت .. انت ياعسكرى رجب
رجب : علم وينفذ يا فندم
شوقى : قولّى بقى بتشتغل ايه ؟
بائع الورد : مطربه ف ديسكو
شوقى : انت هاتهزر معايا
بائع الورد : يا بيه معايا سبت ورد .. وشريطين برشام .. وشكلى رومانسى .. يبقى بشتغل ايه ؟ دايه مثلا ؟ بياع ورد يا بيه .. مأجر الرصيف اللى قدام القسم
شوقى : مأجره من مين ؟
بائع الورد : من ريس المنطقه
شوقى : ريس المنطقه مين ؟
بائع الورد : ايه يا بيه ؟ من صاحب البلد .. اللى اشتراها السنه اللى فاتت
شوقى : اسمه السيد رئيس مجلس اداره المدينه
بائع الورد : تمام .. اسم الله على مقامك العالى يا باشا .. يا كبير .. ياحافظهم لقب لقب و نقب نقب .. قراميطوا لعبطه بالخشن
شوقى : احنا هانهزر سوا .. بطاقتك فين ؟
بائع الورد : الباسبور بتاعى اهه ( يخرج جواز سفر )
شوقى : كمان .. هاته ..( يراجعه ) الاسم ... المهنه .. حاصل على بكالوريوس هندسه .. غريبه ؟
بائع الورد : ايه اللى غريب يا بيه .. هندسه يعنى .. هو انا لوحدى .. ماهم بيجيبوا مهندسين من برا يابيه .. يدقوا الزلطتين تولع الاسعار .. نطلع احنا بره نتبهدل اكتر .. ندق زيهم الزلطتين بس احنا ترخص اسعارنا .. قولى بقى اعمل ايه ؟
شوقى : وكنت بتعمل بقى ايه على الرصيف يا باشمهندس ؟
بائع الورد : بس ماتقولش باشمهندس .. بتغيظنى وبتفرسنى .. بتفكرنى بحاجات رميتها من ورا ضهرى من زمان .. يا بيه دول عماله زايده .. انا بياع ورد وشكلى رومانسى ومسبسب الاساسات
شوقى : ورينى الورد دا ( يشمه ) ايه دا ؟ .. الورد دا مضروب
بائع الورد : حاسب محدش يقدر يمد ايده ع الورد بتاعى .. دانا جامد قوى بعد الساعه 9
شوقى : امال الورد دا مالوش ريحه ليه ؟
بائع الورد : العسكرى رجب شمه كله .. خلص على ريحته .. مانت عارف ورد الايام دى .. شمه واجرى
شوقى : يعنى بتعترف ان الورد دا مشموم
بائع الورد : ومش اى مناخير .. دى مناخير العسكرى رجب
شوقى : ( لسوسو بالدكتافون ) ابعتيلى العسكرى رجب
سوسو : تحت امرك يا فندم .. ( لرجب ) البيه عايزك ( يدخل رجب )
شوقى : دخله الحجز .. بتهمه الغش ف الورد
بائع الورد : لا يا بيه بلاش التهمه دى .. خليها مخدرات احسن .. معايا شريطين برشام اهم .. اى حاجه غير الغش ف الورد
شوقى : اشمعنى بقى
بائع الورد : الورد دا مستقبلى .. الناس لو عرفت انى بابرشم هاصعب عليهم .. هايقولوا من غلبه .. وهاتشترى منى بزياده .. لكن لو غشيت ف الورد محدش هايشترى منى .. وطموحى كله هايضيع تانى
شوقى : انت هاتعرف احسن منى .. دخله حجز اوضه 11
رجب : تمام يا فندم .. انجر قدامى
شوقى : ابعت اللى بعده
رجب : علم وينفذ ( لسوسو ) حجز اوضه 11
سوسو : حاضر .. ( تعطيه مفتاحا من خلفها وتسجله على الكمبيوتر امامها )
رجب : انجر قدامى ( يضع بائع الورد فى الحجز ويتجه للباب ) ابعت للى بعده
( تدخل بائعه المشروبات الغازيه تمضغ لبان .. ويبدو انها بائعه هو تتستر خلف بيع المشروبات الغازيه )
بائع الورد : ( من شباك باب الحجز ) قشطه يابا .. معايا الورد يا مزه .. كراكيبه صوتها فائع )
رجب : اخرس يا متهم
بائع الورد : انا عايز الحجز سيرفس .. عايز كابتشينو باللبن يا هافتن لبتوع حقوق الانسان
سوسو : اوكى .. ( تدق الجرس ) كابتشينو باللبن حجز 11
بائع الورد : اموت ف الاستثمار .. خصخصونى والنبى
بائعه المشروبات : انا هابلغ المسئولين فى النقابه .. احنا ورانا نقابه جامده
رجب : ادخلى بقولك ( تقف امام الضابط شوقى المنهمك فى ورقه )
شوقى : سيبنا لوحدنا يا عسكرى رجب
رجب : علم وينفذ
بائعه المشروبات : انا عملت ايه يا بيه .. دا انا ورايا كوم لحم مستنينى
شوقى : مستنيكى فين ؟
بائعه المشروبات : ف عربياتهم ع الناصيه يا خويا
شوقى : اخوكى ؟! .. ( ينظر اليها فتهم فى خلع عباءتها .. شوقى يتصبب عرقا .. هى ترتدى اسفل العباءه ملابس اخرى توحر بالاغراء الشديد وتخلع غطاء رأسها فتتحول الى فتاه اخرى بالغه الجمال .. شوقى يتصبب عرقا ) ايه دا .. انتى بتعملى ايه .. احنا هنا فى قسم شرطه استثمارى محترم
بائعه المشروبات : اوه نو .. ماحبكش وانتى عصبى ( تقترب منه ) ايه يا بيه مالك .. عرقان كده ليه .. عندك بعد الشر عليك انفلونزا (تقترب منه اكثر ) لا .. دى حمى .. بعد الشر عنك هى حمى
شوقى : ( مقاوما ) انتى بتعملى كده ليه ؟ اقفى عدل
بائعه المشروبات : ( تتمايل يمينا ويسارا ) كده والا كده ( تخرج له زجاجه مشروب غازى وتفتحها له ) حاجه ساقعه ( تعطيها له فيتناولها ويشربها على جرعه واحده و يبلع بصوت مسموع ) 15 جنيه بس يا بيه
شوقى : ايه 15 جنيه على ايه ؟
بائعه المشروبات : هوا كده .. دا دوا الحمى .. انت مش شايف كنت سخن ازاى ؟ .. دا استثمار يا بيه
شوقى : نعم يا ختى
بائعه المشروبات : ما هو يا اما استثمار يا اما رشوه
شوقى : انتى هاتلبسينى تهمه .. انتى نسيتى مين فينا الظابط والا ايه ؟
سوسو : (ترن الدكتافون ) ايوه يا فندم .. فيه ريحه شياط خارجه من اوضه سعادتك .. فيه حاجه يا فندم
شوقى : لا كله تمام
سوسو : طيب يا افندم .. سكرتير سياده اللوا رئيس مجلس الاداره اتصل وبيقول انه على وصول فى زياره مفاجأه .. فخلص بقى
شوقى : جاى .. جهزوا القسم بسرعه .. وابعتيلى عسكرى رجب بسرعه ( يدخل رجب ) خدها الحجز 4 بسرعه .. وهاتلى اللى بعده بسرعه
بائعه المشروبات : والله لاوديكوا ف داهيه .. انا اعرف ناس كبار برضه
رجب : ( يبحث حوله عن بائعه المشروبات ولا يلحظ انها غيرت هيئتها) هى فين المتهمه يا فندم
شوقى : ماهى قدامك اهى
رجب : مش دى يا فندم .. التانيه كانت شبه بنت سياده اللوا .. متفرقش عن منقرع سيادتك
شوقى :اسمع الكلام روح على حجز 4
رجب : اوامرك يا فندم ( يمسكها باستمتاع وهى تسب وتلعن )
شوقى : اللوا جاى .. اعمل ايه .. جهزوا التشريفه
( صوت خارجى .. اصوات عربات .. ثم بروجى عسكرى .. تدخل فرقه استعراضيه .. يدخل اللواء .. يندمج مع الراقصات )
اللواء : بس خلاص ( يجلس على مكتب شوقى)
شوقى ) : يخرجهم ) كله برا .. برا
اللواء : انت ظابط مهمل
شوقى : مهمل سيادتك يا فندم
اللواء : مش فالح بس غير فى معاكسه العفيفات من بنات العائلات المحترمه
شوقى : يافندى سامحنى .. والله دا خطأ غير مقصود
اللواء : احنا فى شغلانتنا دى .. مفيش ادنى استعداد لأى خطأ .. مفهوم
شوقى : مفهوم يا فندم .. ( لنفسه ) مش قادر ينسى اللى عملته ف بنته
اللواء : بتقول حاجه يا حضره الظابط
شوقى : بقول كلام سيادتك مفهوم .. انا تحت امر سعادتك
اللواء : فين قضايا الشهر ؟
شوقى : تحت الفحص والتمحيص سيادتك ( يضع امامه التحقيقان )
اللواء : انت ظابط مش واخد بالك من شغلك .. كل اللى ف الشهر قضيتين بس .. حاجه ساقعه وورد .. دا اللى قدرت عليه يا حضرة الظابط
شوقى : ( بارتباك ) لسه فيه بره يا فندم .. يا عسكرى رجب ..
رجب : تمام يا فندم
شوقى هاتلى بقية القضايا اللى بره .. بسرعه
رجب : تحت امرك يا فندم
شوقى : عارف يا فندم .. القضيه اللى جايه دى .. قضيه كبرى .. قضية فساد .. دى قعدنا وراها لغاية ماعرفنا نجيب قرارها .. مراقبه وخطط وبهدله .. بس كله يهون علشان خاطر الواجب
اللواء : لما نشوف ( يدخل رجب الذى يبدو بمفرده )
رجب : تمام يا فندم
شوقى : فين المتهم يا عسكرى
رجب : قدامك يا فندم
شوقى : يخرب بيتك دا سياده اللوا
اللواء : فين القضيه الكبيره يا حضرة الظابط
شوقى : موجود يا فندم ( لرجب ) فين القضيه هاتودينا ف داهيه ؟
رجب : اهو يا افندم ( يخرج من خلفه طفل بزيه المدرسى )
شوقى : هو دا ؟!
رجب : يافندم دا جرمه خطير
اللواء : ( باستنكار ) هو دا المتهم ؟
شوقى : نعم ؟ ..( ينظر لرجب الذى يهز رأسه بالموافقه ) ايوه يا فندم
اللواء : هو دا اللى قضيت الشهر فى خطط و تمحيص وتفحيص علشان تقبض عليه
رجب : ( يوافق باهتمام ) هو يا فندم .. دا جرمه خطير
شوقى : ( مقلدا رجب ) هو يا افندم .. دا جرمه خطير
اللواء : ايه ؟ .. عاكس بنت الجيران ؟
رجب : اخطر
شوقى : ( يقلده ) اخطر
اللواء : بيسرق العربيات فى الموقف ؟
رجب : افظع
شوقى : افظع
اللواء : بيتاجر ف المخدرات
رجب : اشد شناعه
شوقى : اللى بيقول عليها دى
اللواء : يا خبر .. عمل ايه ماتتكلم ؟
شوقى : يا اخى اتكلم بقى
رجب : فتشناه سعادتك
شوقى : ( يردد خلفه ) فتشناه سعادتك
اللواء : وبعدين ؟
شوقى : وبعدين ؟
رجب : مالقناش معاه سندوتشات يافندم
شوقى : مالقناش معاه سن .... ايه ؟ ( لرجب ) ايه ؟
رجب : سندوتشات
شوقى : ( لرجب جانبا ) مايمكن كلها ؟
رجب : ( يشير باصبعه على رأسه وكأنه استنتج شيئا هاما ) ويمكن وزعها
شوقى : مايوزعها .. وايه يعنى ؟
رجب : ايه يعنى ازاى ؟ وزعها يعنى ماأكلهاش
شوقى : وايه يعنى ؟
رجب : لا يا افندم .. لو ما اكلهاش دا فيه ضرر على صحته .. واحنا
هنا علشان نحمى الشعب
شوقى : يا سلام .. ماهو سليم اهه
رجب : ودا اخطر يا افندم .. لأنه كده بيخلى فيه احتمال ان
السندوتشات اللى وزعها تكون مشمومه او حامضه او حتى
مسمومه .. وبكده يبقى احنا قبضنا على المجرم الصغير
شوقى : ياسلام .. يعنى لو كان كلها هو ومات .. كنت هاتقبض عليه ؟
رجب : يابيه كل نفر مسئول عن نفسه .. احنا بلدنا ديمقراطيه .. والا هاتعترض بقى
اللواء : ايه يا حضرة الظابط .. لقيتوا معاه ايه ؟
شوقى : ( بارتباك ) ولا حاجه يا فندم اصله وزعهم
اللواء : ( باهتمام ) وزعهم ؟
شوقى : وانت عارف سيادتك انه فيه خطر على صحه المواطنين
اللواء : ايه دا
شوقى : اللى اتوزع
اللواء : وايه اللى وزعه ؟
شوقى : ( بخجل ) السندوتشات
اللواء : ( باهتمام اكثر ) ودا نوع جديد من المخدرات والا ايه ؟
شوقى : بالظبط كده .. نوع جديد بس خطير .. هدفه الهاء الناس عن اعمالهم .. والتركيز على المعده مش المخ .. تخيل يا افندم اللى بيتعاطى السندوتشات دى بينخمد وينام وبيجيله تخمه .. ومشاكل صحيه .. زايده .. قرحه .. بنكرياس .. احنا بننقذ الناس من خطر داهم
اللواء : ودا بقى اللى بيوزع السندوتشات ؟
شوقى : تمام يا فندم
اللواء : تعالى يا ولد
الطفل : ايوه يا عمو
اللواء : احنا عايزين مصلحتك .. اتكلم واعترف .. وماتكدبش علشان ماتروحش النار
الطفل : الكدب حرام يا عمو
اللواء : شاطر .. قوللى بقى .. انت وزعت السندوتشات ؟ ( الطفل
يبكى ) اتكلم .. الانكار مش هايفيدك
( يلتف الثلاثه رجب وشوقى واللواء حول الطفل فى مشهد مفزع )
رجب وشوقى واللواء : ( معا ) قول .. الانكار مش هايفيدك .. اتكلم
الطفل : هاقول .. حاضر .. بس محدش يفتن عليا
شوقى : ماتخافش محدش هايفتن عليك
اللواء : ( يخرج مصاصه من جيبه ليناولها للطفل ) خد .. الفتنه حرام
الطفل : مابحبش المصاصات
رجب : ( يأخذها من اللواء ) بس انا بحبها
اللواء : اتكلم يا حبيبى
الطفل : انا خايف
شوقى : ماتخافش بقى
الطفل : بصراحه انا وزعت السندوتشات
اللواء : ( بصرامه ) وكمان بتعترف
الطفل : ماتقولش لماما يا عمو .. احسن تزعل منى
شوقى : ماتخافش يا حبيبى .. انا اللى فاهمك
اللواء : انت بتدلع المتهم يا حضرة الظابط
شوقى : ابدا يا فندم .. انا حتى باطلعله لسانى ( يخرج للطفل لسانه )
اللواء : بسرعه اكتب جواب باستدعاء ولى امره .. قصدى امر بالقبض على امه
شوقى : ليه يا فندم ؟
اللواء : انت مش فاهم والا ايه ؟ بص كده واتعلم .. قوللى يا حبيبى .. امك هى اللى ادتلك السندوتشات .. صح ؟
الطفل : ايوه يا عمو
اللواء : اهه .. امه تبقى الزعيمه .. بتستغل سذاجه ابنها .. دا انا افهمها وهى طايره
رجب : الله اكبر .. يسلم مخ سعادتك يا بيه
شوقى : ( لرجب ) مبسوط كده .. لبست الواد وامه مصيبه
اللواء : بتقول ايه ؟
شوقى : باقول .. مش يمكن ابوه مشترك معاهم ف المصيبه دى
اللواء : ممكن برضه
شوقى : ياللا بالمره هى جت عليه يعنى !
( صوت جلبه وضوضاء بالخارج )
الصوت : انا مش قاعد اكتر من كده .. انتوا قابضين عليا ليه ؟
اللواء : ايه دا ؟ فيه ايه بره ؟ ايه الازعاج دا ؟
شوقى : مش عارف يا فندم
الصوت : هاتولى المحامى بتاعى
اللواء : شايف المهازل اللى بتحصل ف القسم بتاعك ؟
شوقى : هانشوف حالا يا فندم .. ف لحظه واحده كل الامور هاتهدى .. رجب روح شوف فيه ايه برا
رجب : تحت امرك يا فندم
الصوت : مش داخل .. انا ماشى .. هاتولى المحامى بتاعى .. انتوا مش عارفين انا مين .. يا جهله .. يا ممحوكين الثقافه
رجب : ادخل يا متهم
الصوت : متهم ايه يا أمى .. يا فطيس
رجب : خلى يومك يعدى على خير .. خليك فريش
الصوت : ابدا
( يظهر الشد والجذب .. رجب ممسكا بالشخص مصدر الصوت .. الذى يظهر ويختفى حتى ينجح العسكرى رجب فى شده فيظهر للجمهور .. هو المخرج السينيمائى احمد نصر الدين )
احمد : ممكن افهم انتوا واخديننى هنا ليه ؟ انتوا مش عارفين انا ابقى مين ؟ يا جاهل ( يضرب العسكرى رجب ) انا عندى نفوذ .. انا شخص فرى امبورتنت .. مهم جدا ( لشوقى ) تقدر تقوللى انت مين ؟ انت اللى ماسك القسم دا .. ممكن تفهمنى ايه الموضوع بالظبط .. انا قاعد ف حالى .. ع الرصيف .. وعلى موعد مهم مع خطيبتى .. ايه اللى خلى الجاهل دا ياخدنى ؟ ليه ؟ ممكن افهم
رجب : فعل فاضح ف الطريق العام
احمد : اخرس .. فاضح ؟ اذا كان وشى كان ف اتجاه البحر اصلا وقاعد لوحدى حصل والا لأ؟
رجب : حصل .. كمل بقى .. كنت بتعمل ايه ؟
احمد : ولا حاجه .. باطلب حاجه ساقعه
رجب : اهه .. بيطلب حاجه ساقعه وايه ؟ كان بينادى على بتاع الورد .. ودا معناه ايه .. قولوا انتوا بقى .. لما يشرب حاجه ساقعه ويشترى ورد ؟
احمد : ودى فيها ايه .. حران .. وباجيب ورد لخطيبتى اللى انا مستنيها جايه .. والا انت غيران .. قول
رجب : لا يا فندم .. دا كان قدام الولد الصغير اللى قدامك دا .. ( للطفل ) حصل والا لأ ؟
الطفل : ايوه انا شفته
احمد : ودى فيها ايه ؟
رجب : بيفتح عين الولد .. دا مش فعل فاضح ؟
احمد : لو دا فاضح .. امال اللى بيحصل كل يوم دا ايه ؟ خديعة كل يوم .. جرايد كل يوم .. واحداث كل يوم .. الاسعار اللى بتعلا .. البطاله .. الوضع الاقتصادى والاجتماعى .. والانسانى .. فقدان الذات .. البانجو والمانجو والتانجو والحشيش .. الحلم والواقع .. العيشه واللى عايشينها .. كل دا مش فعل فاضح ومفضوح كمان
شوقى : ايه دا انت داخل وواخد ف وشك كده .. اتفضل ( يهم احمد بالخروج ) لا .. اتفضل اقعد
احمد : ليه ؟ .. انا لازم اعرف ليه ؟
شوقى : احنا اللى لازم نعرف .. اقعد ..( للواء ) لا مؤاخذه يا بيه
اللواء : افتح له تحقيق قدامى
شوقى : تحت امرك يا فندم
احمد : يعنى ايه ؟ انا مقبوض عليّا ليه ؟
شوقى : هانعرف كل حاجه .. سين اسمك وسنك وعنوانك ؟ وبتشتغل ايه ؟
احمد : ايه دا ؟ .. مش ممكن .. انت اكيد بتهزر .. فيه حد ف البلد مايعرفنيش
شوقى : جاوب على قد السؤال ؟
احمد : لا مش مجاوب .. اذا كنت مش عارفنى .. دى تبقى فضيحه .. يبقى اكيد فيه حاجه غلط
اللواء : ( لشوقى ) خف عليه دا باينه مهم .. ليكون ابن واحد من الوزرا .. واحنا مش ناقصين .. خف
شوقى : شايف كده ؟!
اللواء : مش شايف بيتكلم بثقه جامده قوى
شوقى : حاضر يا فندم
احمد : ( لرجب ) ماشى يا بوز الاخص .. انا هاخليك تندم ع اليوم اللى انت مديت ايدك فيه عليّا
شوقى : معلش يا فندم دى اجراءات روتينيه .. ممكن نتعرف ( يرن موبايل احمد )
احمد : ( يرد دون استئذانهم ) ايوه يا روحى .. مش ممكن .. ايوه انا موجود .. انا جيت بس حصل حاجه غريبه قوى .. تصدقى يا روحى وانا واقف مستنيكى .. لقيت عسكرى كده يعنى .. داخل عليا بيقولى هات سيجاره
رجب : محصلش
احمد : قلتله .. ليه ؟ .. قاللى ان الرصيف دا بتاعه .. واللى يقف عليه لازم يدفع اتاوه
رجب : ( صارخا ) كداب
احمد : قلتله انا مابدفعشى اتاوه .. لكن ممكن اديهالك رشوه .. قاللى
رجب : استغفر الله العظيم .. رشوه
احمد : اهه .. سمعتيه ياروحى .. قلتله امال عايز منى ايه ؟ قاللى ..
رجب : جرى ايه يا عم .. انا مش عايز منك حاجه
احمد : قلتله .. امال طلبت سجاير ليه ؟ قاللى ..
رجب : ( لشوقى ) انا ماطلبتش منه حاجه يا بيه
احمد : سمعتى .. طبيعى جدا اقوله انت كداب ومجنون ومرتشى ( يدخل عليه رجب متحفزا للهجوم عليه بينما يجسد احمد رد الفعل ) فجأه لقيت مناخيره احمرت .. ونفشت كده وكبرت .. وعينيه برقت .. وبيرفع ايده عليا وهو بيقولى ..
رجب : بقى انا مجنون
احمد : واهبل ومرتشى
رجب : ( للواء ) يا بيه محصلش
احمد : اخرس كل حاجه سجلتها هنا ف الموبايل ( يرتعد رجب )
رجب : ( لشوقى واللواء ) والله ماحصل يا بهوات .. الراجل ده كداب
احمد : فجأه ياروحى .. لقيته بيمد ايده ف جيبى وعايز يا خد سجايرى منى غصب عنى
رجب : انا مابدخنش .. ماليش ف السجاير .. انا معسل وبس
احمد : اتاريه بياخد السجاير من اللى بيعدوا قدام القسم ويبيعها فرط للمساجين جوا
رجب : ( بتلقائيه ) دا استثمار يا بيه
احمد : اهو اعترف بنفسه .. سمعتى يا روحى
شوقى : فضحتنا
احمد : لا خالص انا مش متضايق .. انتى فاهمه يا روحى .. حبيبك مفتح قوى .. ومش اى حاجه بتنرفزنى .. انا متضايق من حاجه واحده بس .. لأ خالص .. مش دى .. ماهو طبيعى لما افقسه واكشفه انه يحاول يلبسنى اى تهمه وخلاص .. مش دا اللى مزعلنى يا روحى .. انا مستغرب ازاى هما مش عارفنى .. تخيلى ياروحى عاملين نفسهم مش عارفيننى .. طبعا اكيد بيمثلوا .. انا متأكد
شوقى : ( لرجب ) باين عليك ورطتنا يارجب
رجب : ( لشوقى ) انا ف عرضك يا باشا
احمد : انا مستنيكى عموما .. اتطمنى هانلحق .. باى ..( للواء ) خطيبتى .. اصل عندنا مشوار مهم .. لازم نلحق نشترى فستان سواريه علشان عندنا حفله بكره وهى زهقانه من كل فساتينها
اللواء : (لاحمد ) اتفضل اقعد يا باشا .. احنا اسفين .. اكيد فيه خطأ .. بس للعلم .. انا مش مستغرب .. القسم دا اكتر قسم فيه اخطاء واهمال .. بل اكاد اجزم انه القسم الوحيد اللى بيحصل فيه كده .. احنا كل ظباطنا وعساكرنا على درجه غير عاديه بل ممتازه من الكفاءه والامانه واحترام حقوق الانسان بشكل عام وخاص مفيش مشاكل بتجيلنا غير من قسم شرطه مشمش سيتى .. ودا ليه ؟ .. لان اللى ماسكه ظابط مهمل .. مش واخد باله من شغله .. واخد بالك .. ظابط مهمل
شوقى : ( لرجب ) مش قادر ينسى مشكلتى مع بنته
رجب : ولا لما افتكرته حرامى ( شوقى يكمم فم رجب )
احمد : ( لشوقى ) تعالى انا عايزك .. قوللى وانا اساعدك .. انت ماتعرفنيش
شوقى : انت باين عليك ابن حلال .. وانا هاقولك علشان تساعدنى
احمد : قول .. كلى آذان صاغيه
شوقى : هاقولك .. الحكايه بدأت من 3 شهور بعد ماستلمت القسم .. وعلى حظى الاسود .. سيادة اللوا ساكن ف نفس دايره القسم بتاعنا .. قريب من هنا
احمد : اه .. ودا معناه انه ممكن يطب عليك كل شويه والتانيه ؟
شوقى : مش دا المهم .. انت وعدتنى هاتساعدنى
احمد : طبعا
شوقى : اوعدنى
احمد : اوعدك ؟! .. انا مش محتاج اوعدك انا كلمتى سيف .. انت ماتعرفنيش بجد بقى
شوقى : لأ ازاى .. سيماهم على وجوههم .. انا هاحكيلك .. المشكله مش مشكله انه بيطب عليا كل شويه والتانيه ..المشكله الحقيقيه انى لاحظت وجود شاب مايص كده كل يوم بيعدى من قدام القسم .. شكله كده مش عاجبنى .. شاب كده تحس انه مش راجل .. اللى هو من النوع اللى انت فاهمه .. اللى مش مظبوط دا
احمد : قصدك انه .....؟
شوقى : ايوه .. قصدى دا
احمد : معقول لسه فيه شباب من النوع دا ف مشمش سيتى
شوقى : ( باستنكار ) تخيل بقى
احمد : ( ممتعضا ) متخيل .. معقول .. انت متأكد انه راجل
شوقى : طبعا .. كنت متأكد انه راجل .. بس لما فهمت كده بصراحه اتقرفت منه
احمد : عندك حق .. راجل شاب وتايه .. حاجه تزعل فعلا
شوقى : تايه ايه ؟ حد جاب سيره تايه
احمد : مش بتقول بيعدى ع القسم كل يوم .. يمكن تايه والا حاجه
شوقى : لا مش تايه
احمد : قصدك .... كده يعنى
شوقى : ايوه قصدى كده .. لا وايه بيبصلى بصات غريبه .. يعنى
حاططنى انا ف دماغه .. وبالصدفه كنا بنأمن حفله تنكريه وشفت الشاب دا لابس مخبر وبيبص عليا .. والغريب انه منتشر قوى وسط البنات .. ويبصلى كده من تحت لتحت وطبعا انا حرصى على سمعه الحفله وسمعتى رحتله ورحت ساكعه قلم على قفاه علشان يحترم نفسه ..
احمد : حقك طبعا .. انت كده بتحافظ على سمعتك وسمعه البلد نفسها
شوقى : انا كنت فاكر زيك كده لغايه لما لقيت سياده اللوا بيتدخل وايه لابس حرامى .. شوف العبث بقى
احمد : وهو بيتدخل ليه .. ليكون الشاب المايع دا .. يا نهار .. قريبه من بعيد
شوقى : لا
احمد : قريبه من قريب
شوقى : جدا
احمد : ماتقولش ان الشاب دا اخوه
شوقى : لأ اقرب
احمد : ايه ؟ ابنه
شوقى : لأ .. طلعت بنته
احمد : ايه .. بنته ؟ هى بنت ؟
شوقى : والله مافى اى اماره خالص انها بنت اساسا
احمد : دا انت نهارك اسود .. دا مش يبهدلك وبس .. كويس انك ماتنفيتش اخر بلاد العالم .
شوقى : ياريته نقلنى .. دا قعدنى جنبه .. واستلمنى بقى .. بيعاقبنى ليل ونهار .. انا قاصدك ف خدمه .. كلم اى حد من المسئولين ينقلنى اى حته .. ودونى المريخ مش مهم .. المهم اخلص من التكدير اللى انا فيه دا
اللواء : انتوا بتتكلموا ف ايه ؟
شوقى : ولا حاجه
احمد : اتطمن ان شاء الله هاساعدك
شوقى : شكرا يا فندم
رجب : عرفته ؟
شوقى : ( هامسا ) اسكت انت .. دا باين له ضهر جامد قوى
رجب : يعنى هو مين ؟
شوقى : مش عارف
اللواء : افتح التحقيق يا حضره الظابط .. ودخل الولد الصغير دا الحجز الولا نام على نفسه وابعت اقبضوا على امه وابوه ..
شوقى : تحت امرك يافندم ( يشير لرجب الذى يخرج الطفل ويضعه فى الحجز ويعود مهرولا ممسكا بزجاجه مياه غازيه كحجه للتواجد اثناء التحقيق ) معلش يا فندم .. مجرد اجاءات روتينيه .. اسم سيادتك ايه
احمد : معقول .. انت مش عارفنى بجد بقى
شوقى : لا طبعا عارفك .. بس لازم تقول قدام سيادة اللوا ( هامسا له ) عرفه بنفسك يا بيه خليه يتخض لما يعرفك .. ارجوك
احمد : امرى لله .. انا
رجب وشوقى واللواء : ايه ؟
احمد : ( بفخر ) انا
رجب وشوقى واللواء : ( باهتمام اكبر ) هه
احمد : احمد نصر الدين
رجب : والله ماكان قصدى يا بيه .. اهلا وسهلا يا احمد بيه ( يأخذ زجاجه المياه الغازيه من امام اللواء ويناولها له ) اللى مايعرفك يجهلك ..
اللواء : انت تعرفه ؟
شوقى : لأ (لرجب ) انت تعرفه ؟
رجب : لأ برضه
شوقى : امال بتعمل كده ليه ؟
رجب : خفت منه يا بيه .. اصله واثق ف نفسه قوى
شوقى : السن يا احمد بيه
احمد : 35 سنه
شوقى : محل الاقامه يا استاذ احمد
احمد : 9 حاره خرزان الميمون المتفرع من شارع الحنش مشمش سيتى
شوقى : حاره ؟ آه .. وبتشتغل ايه بقى يا احمد
احمد : مش ممكن
شوقى : مجرد روتين ليس الا .. بتشتغل ايه يا حماده؟
احمد : انا مخرج سينما
رجب وشوقى واللواء : ايه ؟
احمد : مخرج سينما .. فنان .. عبقرى .. سابق عصرى
رجب : ياراجل نشفت دمى
شوقى : وسايبنى احكى .. واقول
اللواء : انت جاى بقى تمثل علينا .. اتنيل واقف
احمد : ايه دا ؟! انتوا مش عارفين بتكلموا مين والا ايه ؟
اللواء : ماخلاص عرفنا .. وانت بقى يا مخرج اخرجت ايه ؟
احمد : مش ممكن تكونوا مش عارفين الغربال
رجب : الغربال اللى بننخل بيه الدقيق
احمد : دقيق ايه ياغبى
رجب : بس ماتقولش غبى يا بتاع السيما والا ( يهم برفع يده )
شوقى : يعنى ايه الغربال ؟
احمد : دا الفيلم بتاعى .. دا كل الجرايد والمجلات كتبت عنه
شوقى : كتبت عنه ؟ دا انت مهم بقى .. وكتبت ايه ان شاء الله
احمد : مش مهم
اللواء : لأ .. لازم نعرف
احمد : مش لازم
شوقى : لأ هاتقول
احمد : يعنى .. دا اختلاف ف وجهات النظر
رجب : لأ بقى دا بيتهرب م الاجابه يا فندم
احمد : ابدا .. بعض النقاد الحاقدين الغير متطورين اتهموا الفيلم انه صوت من غير صوره وبالتالى ماشافوش حاجه
شوقى : ليه ؟
احمد : وببساطه كده هما اثبتوا بالدليل القاطع انهم عمى
اللواء : ليه بعنى ؟
احمد : اصلى كنت بصور وانا حاطط قدام العدسه غربال
رجب : اشمعنى يعنى
احمد : هو دا التجريب .. انتوا ناسيين ان اللى مايشوفش م الغربال يبقى اعمى .. وبالتالى كان التكنيك الجديد ف التعامل مع اللوكيشن ( يلاحظ ان حركات يد المخرج مبالغ فيها اثناء الشرح )
شوقى : وانت جاى بقى تتنطط على فيلم فاشل وتلاقيك معملتش غيره
احمد : لا طبعا .. عملت فيلم تانى .. دا بقى اللى كسر الدنيا
اللواء : معقول
احمد : طبعا .. مقعدش غير حفله واحده .. والناس شافته من هنا .. وبقوا يكسروا الكراسى ويقطعوا الشاشات .. لدرجه انهم دشدشوا الراجل اللى بيبيع التذاكر للفيلم علشان هو اللى باعلهم التذاكر .. دا كان رد فعل السينيمات كلها .. الفيلم فجر طاقه المشاهدين كلهم
اللواء : ليه انت اخرجت ايه المره دى .. فيلم عنف
احمد : انت بتهزر .. ليه بتقول كده ؟
اللوا : يعنى .. لما اخرجت فيلم الغربال الناس اتأثرت بالعمى
احمد : فعلا والناس كلها اللى اتفرجت عينيها مزغلله لغايه النهارده .. انا جاتلى جوابات شكر من دكاتره عيون كتيره
اللواء : المره دى الناس كسرت السينما .. يبقى اكيد فيلم عنف
احمد : بالعكس .. الناس حست بحالها .. الفيلم كان فلسفى .. وداخل ف النفس البشريه .. فيلم يدعو الى التأمل الشديد
شوقى : تأمل ؟ .. ازاى بقى يا مخرج ؟
احمد : الفيلم اسمه ليله القبض على دولة الارهابى .. والفيلم مدته ساعتين .. وكده فيلم مش طويل اصلا .. اول عشر دقايق فيها دوله قويه عايزه تحتل دوله تانيه بحجه ان عندها ارهاب .. فرئيس الدوله القويه سأل عن تكلفه الحرب فاكتشفوا انها 900 مليار بالعمله بتاعتهم وبعدين سأل لو حبايبهم اشتروا اراضيها هاتتكلف كام لقوها حوالى 300 مليار بعملتهم .. قال خلاص اشتروها .. المشهد اللى بعده على البلد التانيه عليها شاشه سودا وكتبت عليها .. باعوها لغاية اخر الفيلم
شوقى : نعم ؟ باعوها .. لآخر الفيلم .. يعنى قد ايه ؟ 110 دقيقه كاتب للناس باعوها .. بس مفيش اى حاجه تانيه ؟
احمد : بالذمه دا كلام .. لا طبعا .. كنت باغير الوانها
شوقى : ياسلام
احمد : طبعا .. ثقافه .. وجهة نظر .. 110 دقيقه من التأمل الشديد جدا ف الفكره .. باعوها .. واو .. فجرت خيال المتفرج .. وانفجر معاها .. والسينما فرقعت من التأمل .. حصل خروج متدافع لطاقه الغضب المكبوته ف النفس الانسانيه الكتومه المظلمه بالاحداث المتراكمه كما وكيفا فى دواخل روحه المتعايشه مع الواقع .. والله كان فيلم تحفه .. دا فيلم من اهم افلام العالم الحديث ( فرحا ) عنده حق يكسر الدنيا
شوقى : كان لازم يكسر الدنيا .. ودماغك كمان .. انت عايزنى ادخل السينما اتفرج على يافطه ويا فرحتى كان بيغير الوانها .. دا انت فظيع .. اقبضوا عليه
اللواء : امال هو ايه دلوقتى يا حضره الظابط ؟
شوقى : لامؤاخذه يافندم .. اصله لخمنى
اللواء : انت اللى ظابط مهمل
شوقى : حاضر يا فندم .. اترزع بقى قدامى وقولى كنت واقف مستنى مين ؟
احمد : خطيبتى
شوقى : خطيبتك برضه والا .....
احمد : انا ارفض التلميح دا .. انا شخص مثقف
شوقى : اخرس دا انت ليلك طويل
( صوت ضجيج بالخارج )
اللواء : ايه الصوت دا ؟
سوسو : ايوه يا فندم .. فيه تجمهر بره باب القسم
شوقى : تجمهر ازاى .
احمد : تجمهر علشانى طبعا .. اهو شايف يا فندم .. الدنيا قامت علشانى
اللواء : اسكت انت .. انا متغاظ منك .. اخرس خالص
شوقى : ( لرجب ) روح شوف فيه ايه برا ؟ ( يخرج رجب )
احمد :هاتشوف دلوقتى .. الدنيا كلها واقفه على رجل علشانى .. هاتلاقى بعد شويه قرارات هاتعلن .. صحافه هاتتكلم .. مانشيتات
شوقى : يا عم اتنيل واسكت
( يدخل رجب لا يتمالك نفسه من الفرحه والاندهاش )
رجب : الحق يا بيه .. الحق يا باشا .. الدنيا مقلوبه بره
احمد : اشرب بقى
رجب : اسكت انت .. تخيل .. فيه تاكسى وقف قدام القسم ..
شوقى : وفيها ايه
رجب : المهم اللى نزل من التاكسى ..
شوقى : مين ؟
احمد : تلاقيه رئيس النقابه
رجب : هوبا اطلع فوق
احمد : ماتقولش اكيد الوزير
رجب : ف تاكسى .. ياجدع ماتوديناش ف داهيه .. المهم هى نزلت من هنا والدنيا اتلمت من هنا
شوقى : نزلت .. دى واحده ست يعنى
احمد : احتمال حرم السيد رئيس النقابه .. معقول
رجب : اسكت انت .. دى الست مايسه بتاعة اعلان المكرونه ..( يغنى ويتمايل ) بتاعه تاكلها بالشوكه تاكلها بالمعلقه .. هى بتتاكل اكل
احمد : دى خطيبتى
( يبدأ الجميع ف ترتيب هندامه ويتأنقون )
شوقى : خليها تتفضل
احمد : فيه ايه ؟ بتعملولها كده ليه ؟ دا كل اللى عملته اعلانين مكرونه .. انا مخرج .. معملتوش كده معايا ليه ؟
شوقى : ماتسكت يا جدع انت
( تدخل مايسه وهى موديل اعلانات .. ملابسها غريبه وتضع مكياجا مبالغا فيه .. وتتهادى ف خطواتها .. ردود افعال تعبر عن الاعجاب بها من الجميع ماعدا احمد الذى ينظر مندهشا لما يحدث )
مايسه : مايسه نعمان .. اتمنى مكونش معطله حضراتكم
اللواء : لا عطلينى يا فندم .. دا انتى واجهه مشرقه للفن العربى كله .. انتى القوه الدافعه للاستثمار ف الجمهوريه الملكيه العربيه الاعداديه المشتركه .. يادينامو الاقتصاد الوطنى .. امثالك من الواجهات المشرفه للوطن داخل وخارج القنوات الفضائيه من اللى بتدعم المنتجات وربحيتها السياسيه والاقتصاديه
احمد : ( باستهزاء ) الشموليه منها والرسماليه .. ويحيا المجتمع الاستهلاكى فدا عيونك يا قمر .. وهاتلى طبق كشرى ياعم
شوقى : شرفتى قسم شرطه مشمش سيتى يا افندم
اللواء : اسكت انت يا ظابط يا مهمل
احمد : ( لشوقى ) تعالى جنبى .. اصل المكرونه سرها باتع .. خليك جنبى
اللواء : ممكن صوره يكون عليها توقيعك الجميل
مايسه : طبعا ( تخرج من شنطتها صوره وتعطيها له بعد توقيعها )
اللواء : ميرسى يا فندم ( يضحكان )
شوقى : يا باشا واضح ان الانسه مايسه عندها شغل ومش عايزين نعطلها
اللواء : ( بغيظ ) طبعا .. احنا تحت امرك
مايسه : ابدا كنت عايزه اعرف انتوا قبضتوا على خطيبى ليه ؟
اللواء : ومين اللى يجرؤ على كده .. ابدا محصلش .. يمكن الظابط المهمل دا ؟
شوقى : انا قبضت عليه بناء على توجيهات سعادتك يا فندم
اللواء : اخرس .. دا ظابط مهمل وانا هاربيه
مايسه : مش مهم .. المهم احمد نصر الدين
اللواء : مين دا ( لشوقى ) انت تعرفه ؟
شوقى : مش واخد بالى
احمد : لا بقى .. انا لسه قايله اسمى
مايسه : خطيبى المخرج احمد نصر الدين
اللواء : بتاع الفيلم الضلمه .. دا اشهر من نار على علم
مايسه : دا خطيبى واحنا عندنا بارتى النهارده ومش ممكن اروح من غيره .. يرضيك كده
احمد : يعنى ايه ؟ انتى واخدانى دراع تتسندى عليه والا ايه ؟ انا اللى واخدك معايا مش العكس
مايسه : لا انا اللى واخداك معايا .. انت محدش يعرفك .. انا اللى معزومه
احمد : خلاص روحى انتى
مايسه : ايه دا .. انت بتهددنى .. خلاص خليك هنا .. خليه ف الحجز ياسياده الظابوط
احمد : وايه يعنى .. هو انا بخاف ؟
اللواء : دخله الحجز يا عسكرى ( رجب يمسكه من قفاه )
شوقى : معقول يا مايسه هانم .. تيجى من غير ماتشربى حاجه كده
مايسه : والله صعبت عليا .. خلاص رجعه تانى يا حضرة الظابوط
اللواء : جرى ايه يا عسكرى رجب ؟ هو انا قلتلك توديه الحجز برضه ؟ انا بقولك خليه يا بنى ادم
رجب : ماسمعتش كويس
احمد : يعنى ايه .. بتتحكمى فيا من اولها ؟ .. اسمعى انا راجل .. وكلمتى هى اللى هاتمشى عليكى .. انتى دايما عايزه تبانى ف الصوره وايه يعنى .. ماهو انا اللى عاملها .. بس مش عامل مسوخ واعلانات
مايسه : يا حسره .. بتسمى اختراعاتك دى عمايل .. قلتلك تعالى اعملى اعلانات .. فيديو كليب .. افلام هابطه عايشلى قوى ف الثقافه ..افهم بقى دا سوق .. كله تسويق ف تسويق .. بيع وشرا
احمد : بذمتك دا وقت تقوليلى فيه الكلام دا .. جايه تفرحى فيا مش كده؟ لا بقولك ايه .. مش عايز منك حاجه .. سيبينى وامشى
مايسه : دا بدل ماتقوللى شكرا .. طيب .. رجعه الحجز يا ظابوطتى
اللواء : ظابوتك .. جرى ايه يا عسكرى .. انا مش قلتلك وديه الحجز
رجب : يا فندم انت قولتلى رجعه
اللواء : وكمان بتكدبنى .. دا قسم شرطه كله اهمال
رجب : خلاص اوامرك يا بيه
شوقى : ( لمايسه ) لو دخل يا ست هانم مش خارج تانى .. خرجيه الاول وبعد كده خانقيه
مايسه : شايف كده .. خلاص يا ظابوطتى .. رجعه تانى .. هو مش هايعمل كده خالص مالص تانى
اللواء : انت موديه فين يا عسكرى
رجب : الحجز يا فندم
اللواء : ومين اللى امرك بكده
رجب : سيا.... سيادة العميد شوقى
شوقى : دا كداب يا فندم
اللواء : ظابط مهمل .. انت نهايه خدمتك على ايدى .. تقدر تقوللى ايه تهمته ؟
شوقى : اللى تؤمر بيه
اللواء : يخلى سبيله فورا
شوقى : خلاص يخرج
رجب : ودا اخر كلام
شوقى : اسكت هاتودينا ف داهيه ..(يكتب ورقه ) ودا امر افراج بدون اى ضمانات
اللواء : ( لمايسه ) حلو كده
مايسه : ميرسى جدا
اللواء : وانا مش هاسيبك يا ظابط يا مهمل ..(لمايسه ) ودا رقم تليفونى يارب يعجبك ؟
احمد : ايه دا ؟
اللواء : الرقم .. والله انا منقيه من بين ييجى 100 رقم
مايسه : دا حلو خالص .. عن اذنكوا .. ياللا يا احمد
شوقى : يا نهار .. طب اعمل ايه دلوقتى ؟ انت مش وعدتنى انك هاتحل مشكلتى ( احمد يهمس له فى اذنه ) ماقدرش لأ
احمد : هو دا اللى عندى .. سلام ( مايسه واحمد يخرجان )
اللواء : اما انت بقى يا ظابط يا مهمل .. ليك معايا عقاب محدش شافه من قبل ومن بعد
شوقى : يا فندم انا عايز اقولك على حاجه مهمه .. انا بصراحه طالب ايد بنتك المصونه وعايزها تبقى شريكتى ف الحياه
اللواء : انت بتقول ايه ؟ اى نعم انت من اكفء الظباط اللى عندى .. واقربهم لقلبى .. بس انت عارف ان حياه البوليس صعبه وكلها متاعب .. وانا بنتى غاليه عندى قوى .. بس انت كمان غالى .. على خيره الله .. الف مبروك
( العسكرى رجب يزغرد )
----- اظلام -------
شريف صلاح الدين
2002
